分類彙整:發現台灣A水

愛嬌姨的酒鬼仔翁

愛嬌姨的酒鬼仔翁====圖文/京城

細漢時陣的愛嬌姨,是千金小姐
逐工山珍海味穿媠衫
毋免煩惱食佮喙會焦
爸母敢偌命咧疼。

大漢愛著放蕩囝
酒是翁的心肝
手摜晃頭仔四界行
起先以為會好命
啥知天公伯仔早注定
愛嬌姨仔為著生活,從此佮錢拼。

透早擔著菜擔
衫褲有補過的痕漬
沿路賣著伊種的生命
一工所趁的哪會當做私奇
酒鬼仔翁全部搶去買酒做飯食。

※ ※※

這款日子,經過幾偌冬
人講酒飲傷濟是會死人
倒佇眠床頂的酒鬼仔翁
醫生講 只賰半年喘氣的希望。

愛嬌姨的酒鬼仔翁
在生親像野鬼會食人
欲死毋規氣猶毋放
去啊 嘛無留半項
留予愛嬌姨仔只有委屈佮毋願。

拍開門窗
鳥隻在跳浪
吮一口氣,放輕鬆
愛嬌姨仔的後世人
親像是拄好欲出來的太陽。

隔壁嬸婆無生半個查某囝

隔壁嬸婆無生半個查某囝========京城

紅磚仔壁的戶定跤
成群結隊的狗蟻
爬對壁角,搬著一隻死拉牙
嬸婆失神失神坐佇遐
手捧一塊空碗等欲食。

伊有三個後生,無生半個查某囝
隔壁嬸婆著是按呢過生活。

大漢後生的頭一擺
談戀愛著失敗
打擊傷大,予白頭毛送黑頭毛真不該
隔壁嬸婆傷心,欲按怎
嘛毋知

第二後生毋成材
佮人舉槍學做歹
搶銀行彼一擺
即馬蹛佇籠仔內。

第三後生嘛是害
強力膠是伊的上愛
不時馬西馬西,啥物攏毋知
警察仔三不五時對厝仔來。

隔壁嬸婆無生半個查某囝
後世人只有 酸摻鹼
一生佮苦做伙 天注定。

隔壁嬸婆偌有生查某囝
即馬應該抱外孫 惜命命。

愛情輪迴

愛情輪迴====京城

真心付出這呢濟,你煞欲揣第二個
毋相信,心難過,以為是你咧講笑話。

目屎綴著風咧飛,思念像水遐爾濟
無處買,心怨磋,你是無法度通體會。

我像斷線的風吹
到底是欲飛去佗
感情已經親像水撥落地
安怎收嘛收不回。

我像斷線的風吹
飛去佗位無人陪
飛落海邊煞沈落去海底
一場愛情的輪迴。


豆花伯仔的豆花

豆花伯仔的豆花====京城

踮佇黃昏市場口的市街,
來來去去的人客,
紅磚仔牆邊的一擔豆花,
他是70外歲的豆花伯,

停佇伊的豆花擔的人客無算濟,
若是對著伊的身邊過,
會時常聽著伊的喝聲~來食好食的豆花。

毋過毋捌看見伊 有人陪,
毋知影怹兜蹛佇佗,
有人問伊賣豆花 生活甘好勢?
後生查某囝哪會無出來陪?

他講後生趁錢為著另外一個家,
查某囝嫁翁已經別人的,
豆花姆仔已經佇天頂佮仙做伙,
他講一支嘴毋免食外濟,
一個人若飽 規家伙仔著好過,
他閣講這種小寡代誌毋免講甲這詳細,
伊會驚歹勢。

豆花伯的豆花 賣出一個風中殘燭的身體,
豆花伯的豆花 賣出一個心酸的身世,
豆花伯的豆花 賣出講袂出嘴的話,
豆花伯的豆花 賣出一個無像家的家,
豆花伯的豆花 賣出一個頭毛嘴鬚白的老阿伯。

你甘知 老大人需要的是啥貨!
毋是孤苦無依 委屈強忍心底。

這馬的社會 豆花伯仔有幾個?
他的故事 親像電視劇一回扮過一回。

思念這呢厚(影音版)


佇阮兜的門跤口
一片青蘢蘢的秧仔 隨風飄搖
秧仔若欲變稻仔愛等時候
阿爸 踦佇即面的田岸頭
巡到田尾的水溝

這呢大粒的日頭 汗水嘛筘筘流
這馬的少年人毋肯做的穡頭
阿爸 五十幾歲的歲頭
看起來已經真老

十外年啊 想起著…
世事予人料想袂到
阿母等待阿爸食飯的中晝
無情的天公伯仔 雄雄拆散阮一家口
失去老伴的阿母強強欲擋袂牢

十外年啊 阮看著…
爸子緣份斷了後
夢中阿爸猶原遐爾緣投
共阮攑佇肩胛頭
阿爸 甘知阮對你思念這呢厚

囥佇厝角彼枝鋤頭
孤單無伴親像嘛咧吼…

◎後一個春天



春天有花開的氣味,蝴蝶弄花笑瞇瞇
缺角的月娘難圓,裂縫的感情歹抹平
雖然身在繁華都市,心像一堀冷去的死水池。

閣想過去只有傷家己
只好放棄,將妳放袂記,妳猶原是妳
雖然妳近在眼前,煞遠在天邊
縱然傷痕累累,強欲袂喘氣
賭強失去意義。

今夜予我醉,予我好好仔醉一暝
天若光煩惱放流水,佗位有我後一個春天。

 

◎飛


聽講寂寞有來過,惦惦無聲無勢
他揣孤單來相陪,阮對你的思念加倍。

牛郎織女一年一會,蒼天抑會難過
癡情英台山伯,為著愛情化作蝴蝶雙雙飛。

風輕輕對面吹,雨為阮徘徊
青春年少如紅花,花落已經收不回
想欲飛,想欲飛,飛出寂寞的手底
想欲飛,想欲飛~~作一隻無憂無愁的風箏。

風猶原繼續佇吹,雨毋捌停過
桌頂茶杯內底的茶,冰冷如雪
想欲飛,想欲飛,毋通對愛太過癡迷
想欲飛,想欲飛~~愛是還袂了的一款情債。



(大坑清心橋有如大鵬展翅)

◎聽候

(捧在手掌心的太陽)

一句話囥佇心肝頭,抑袂講出喙目屎著先流
一粒心肝佇等候,一个會當偎靠的肩胛頭。

眠床頂的枕頭,為著主人夜夜等候
孤單的心情毋敢哮,目屎當作雨水流
憨憨聽候 予你將欠我的情債還了。

男兒出外奮鬥,我佇故鄉逐工等候
相思的心情講袂透,對你的思念遮呢厚
乖乖聽候 衣錦還鄉的時機 將近欲到。

心肝佇等候,阮需要一个溫暖的肩胛頭。

(看我的螺旋掌+龜派氣功 )



(落日餘暉,我把太陽打包了)
 

◎一口氣


按照劇本的指示,即齣戲已經煞棚
結局是喜是悲,戲中人遮知滋味
2个人的人生大戲,抑袂開始,著已經完結篇。

目一睨,花謝花又開,無妳的世界無春天
閣等落去,只有黃昏伴家己。

目一睨,一年四季,已經無少年的年紀
白髮蒼蒼,只賰淡薄仔氣絲。

隨時著會赴陰司,想欲強留一口氣
天公伯仔甘願意,即陣著愛好好過日子
望蒼天恩賜一个 我上愛的你。